Hópurinn vill stuðla að aukinni vitund og þekkingu er varðar gæðastjórnun, ISO stjórnunarkerfi og sem og önnur gæðastjórnunarkerfi.
Fundir eru ýmist fjarfundir með fyrirlesara eða staðfundir þar sem lögð er áhersla á jafningjafræðslu - allt eftir því sem við á. Við hvetjum alla sem hafa hugmyndir að fyrirlestrum og erindum sem styðja markmið og umfang faghópsins til að hafa samband við stjórnarmeðlimi hópsins. 

Markmið faghópsins

• Auka skilning og notkun gæðastjórnunar, stjórnunarkerfisstaðla og tengdra staðla m.a. til að: stuðla að aukinni ánægju hagaðila, uppfylla kröfur, auka framleiðni, skilvirkni og árangur skipulagsheilda.
• Lagt er upp með að bjóða upp á fyrirlestra og aðra viðburði til að auka kunnáttu, færni í gæðastjórnun og stjórnunarkerfum.
• Stuðla að tengslamyndun og miðlun á reynslu og þekkingu.

Stjórn hópsins skipuleggur; fjarfundi, staðfundi og ráðstefnur þar sem fengnir eru fyrirlesarar sem hafa framsögu um málefni sem áhugavert er að ræða í tengslum við gæðastjórnun, stjórnunarkerfi eða staðla, gjarnan í samstarfi við aðra faghópa. Einnig eru rædd þau viðfangefni sem koma upp og ábendingar um leiðir til að leysa þau. 

Faghópafundir eða ráðstefnur nýtast bæði byrjendum í heimi gæðastjórnunar og staðla og þeim sem lengra eru komnir.

Umfang faghópsins

Umfang faghópsins snýr að gæðastjórnun og látum við okkur varða ISO stjórnunarkerfisstaðla sem og önnur gæðastjórnunarkerfi.

Við hvetjum alla sem hafa hugmyndir að fyrirlestrum og erindum sem styðja markmið og umfang faghópsins til að hafa samband við stjórnarmeðlimi hópsins.

Stjórnunarkerfi

Stjórnunarkerfi, þ.m.t. stjórnunarkerfi gæða, innibera aðgerðir sem skipulagsheildir beita til þess að m.a. skilgreina stefnu og markmið, skilgreina kröfur, stýra áhættu, ákvarða ferla og auðlindir sem þarf til þess að ná þeim árangri sem sóst er eftir. Allir svo kallaðir ISO stjórnunarkerfisstaðlar (e. ISO management systems standards) eru byggðir upp á sama hátt og þá má því sameina að stóru leyti í eitt stjórnunarkerfi og spara með því umtalsverðan kostnað og auka skilvirkni. Þeir ISO stjórnunarkerfisstaðlar sem hér um ræðir eru:

- Stjórnunarkerfi gæða, samkvæmt ISO 9001
- Stjórnunarkerfi umhverfismála, samkvæmt ISO 14001
- Stjórnunarkerfi upplýsingaöryggis, samkvæmt ISO 27001, einnig má tengja við þennan staðal öryggisaðferðir persónuverndar ISO 27701
- Stjórnunarkerfi um heilbrigði og öryggi á vinnustað, samkvæmt ISO 45001
- Stjórnunarkerfi jafnlauna, samkvæmt IST 85, séríslenskur staðall sem er að mestu leyti byggður eftir ISO 9001 staðlinum.
Til eru fleiri staðlar sem tengja má við áðurnefnda staðla með sbr. nefndann ISO 27701 en þeir verða ekki taldir upp hér.

Almennt um gæðastjórnun

Gæðastjórnun er aðferðafræði við stjórnun fyrirtækja sem hefur þróast frá því að vera einföld stýring á framleiðslu yfir í að taka á öllum hliðum rekstrar óháð eðli fyrirtækisins. Hugmyndafræðin byggir á því að hafa þarfir hagsmunaaðila ávallt að leiðarljósi og reyna sífellt að gera betur, breyta og bæta.

Saga gæðastjórnunar er rakin til nokkurra Bandaríkjamanna og frumkvöðlastarfs þeirra um miðja síðustu öld. Má þar helst telja þá Walter Shewarth, Armand V. Feigenbaum, Josep M. Juran og W. Edwards Deming sem lögðu grunn að gæðastjórnunarfræðunum eins og við þekkjum þau í dag.

Á meðan sum fyrirtæki leggja áherslu á alhliða gæðastjórnun (e. Total Quality Management), þar sem ýmsum verkfærum gæðastjórnunar er beitt, styðjast önnur við alþjóðlegan staðal um gæðastjórnun, ISO 9001, við uppbyggingu gæðakerfa. 

Gæðastjórnun tengist náið ýmsum aðferðafræðum s.s. Lean - straumlínustjórnun, verkefnastjórnun og stefnumótun þar sem beita þarf öllum þessum aðferðum að einhverju leyti ef ná á árangri með gæðastjórnun.

Það að innleiða gæðastjórnun er stefnumótandi ákvörðun um langtímaviðfangsefni sem krefst stuðnings allra stjórnenda fyrirtækis. Gæðastjórnun má innleiða í hvaða fyrirtæki eða stofnun sem er með því að aðlaga hugmyndafræðina að stærð og starfsemi fyrirtækis. Leiðarljósið er ávallt það sama, að bæta frammistöðuna og að auðvelda fyrirtækinu að ná markmiðum sínum.