Þú uppskerð eins og þú sáir
Fyrir nokkrum árum síðan sat ég fyrirlestur þar sem fjallað var um nokkrar hliðar atvinnuleitar þar sem ferilskráin var eitt af aðal umræðuefnunum. Fram að þessum fyrirlestri hafði ég lítið pælt í því hvernig ætti að setja upp ferilskrá, hvað hún ætti að innihalda og hvað vel unnin ferilskrá skiptir í raun og veru miklu máli. Þegar ég setti mína fyrstu ferilskrá saman fór ég þessa almennu leið, tók saman helstu upplýsingar um sjálfan mig, menntun, starfsreynslu, áhugamál o.fl án þess að bæta einhverju aukalega við og pæla í framsetningu. Þetta á eflaust við marga sem eru að setja saman sína fyrstu ferilskrá.
Það er eflaust ekki til hin eina rétta leið við að setja upp ferilskrá en það eru til margar rangar og allt of margir eru að brenna sig á þeim. Ég myndi seint telja mig einhvern sérfræðing í gerð ferilskráa, en á síðustu árum hef ég fengið tækifæri við að aðstoða, lagfæra og meta ferilskrár hjá hinum og þessum. Ég tók þá eftir að allt of marga skortir metnað og þekkingu við að setja upp einfalda ferilskrá.
Af hverju ætti fyrirtæki að búast við metnaðarfullum starfskrafti ef hann hefur ekki metnað til að senda frá sér almennilega ferilskrá ?
Gefðu þér tíma og leggðu metnað í ferilskránna, því hún eru fyrstu kynni fyrirtækisins á þér. Taktu fram það sem þú hefur afrekað í fyrri störfum og hvað þú lærðir á þeim tíma sem getur gagnast þér í nýja starfinu. Ekki eyða plássi í upplýsingar sem skipta minna máli eins og til dæmis áhugamál. Ferilskráin á að vera vel hnitmiðuð, þ.e. 1-2 blaðsíður í mesta lagi.Eibeittu þér að því að setja inn upplýsingar sem eiga við það starf sem þú sækir um.
Eftirfarandi atriði er t.d. gott að taka fram :
Almennar upplýsingar um umsækjenda | Nafn, Kennitala, GSM, Vefpóstur, Heimilisfang
Menntun | Ár, Skóli, Námsbraut
Starfsferill | Talið upp frá nýjasta starfi til þess elsta | Eðli starfs, Afrek, Lærdómur
Verkefni og/eða Félagsstörf
Aðrar upplýsingar | Tölvu og Tungumálakunnátta
Umsagnaraðilar
Hér heima er venjan að hafa mynd af umsækjanda í ferilskrá og því er kostur að hafa góða mynd, því engin mynd er betri en léleg mynd. Innsiglaðu svo góða vinnu með því að vista ferilskránna á PDF skjali áður en þú sendir hana frá þér.
Seinast en ekki síst þá er hvet ég lesenda til að Googla nafnið þitt, því það eru meiri líkur en minni að aðilinn sem þú sækir um vinnu hjá muni gera það. Þá er gott að vera búinn að hreinsa út allt sem gæti haft áhrif á umsóknarferlið.
Vonandi að þessi færsla komi að góðum notum þegar kemur að því að setja saman ferilskrá.
Gangi þér vel !
