Síðasti fundur faghóps um gæðastjórnun starfsárið 2012 - 2013 verður haldinn hjá Íslenskum aðalverktökum fimmtudaginn 30. maí næstkomandi. Sigurður Ragnarsson, framkvæmdastjóri tæknisviðs, flytur þá erindi sem ber yfirskriftina „Gæðastjórnun í íslenskum byggingariðnaði - Höfum við gengið til góðs?“

Í erindinu fjallar Sigurður um gæðastjórnun í íslenskum byggingariðnaði og þróunina síðastliðin 15-20 ár. Sigurður fjallar um byggingariðnaðinn í víðu samhengi, það er verkkaupa, hönnuði (arkitekta og verkfræðinga), verktaka og efnissala.

Sigurður lauk BSc gráðu í verkfræði frá Háskóla Íslands 1989 og MSc gráðu í sama fagi frá Danmarks Tekniske Højskole 1991. Frá útskrift hefur hann unnið við verkefna- og fyrirtækjastjórnun hjá stórum fyrirtækjum í byggingariðnaði. Sigurður stýrði t.a.m. byggingu Hörpunnar, tónlistar- og ráðstefnuhúss. Í byrjun árs 2012 hlaut hann fyrstur Íslendinga alþjóðlega A stigs vottun sem verkefnastjóri.

Þá er komið að næst síðasta viðburði Lean faghópsins sem haldinn verður miðvikudaginn 5.júní kl.08:30 hjá Össur, húsið opnar 08:15. Þeir Axel Guðni Úlfarsson og Birgir Grétar Haraldsson frá fjármálasviði fyrirtækisins taka á móti gestum, bjóða upp á léttan morgunmat og kaffi ásamt því að fara yfir innleiðingu Beyond Budgeting módelsins innan Össurar.

Fyrirlesturinn mun fjalla um innleiðinguna sjálfa og hvernig sú breyting hefur haft áhrif á það hvernig fyrirtækinu er stýrt án þess að styðjast við hefðbundnar fjárhagsáætlanir (Budget). Össur hefur notið handleiðslu Bjarte Bognes sem er formaður Beyond Budgeting Round Table í evrópu. Hann var líka fyrirlesari á Lean Ísland ráðstefnunni sem var haldin núna í byrjun maí við góðan orðstír.

Kæru félagar!
Vegna fjölda áskorana um að hafa vinnustofuna á heppilegri tíma hefur stjórn Lean faghópsins tekið þá ákvörðun að færa vinnustofuna til haustsins.
Gleðilegt sumar!
Stjórnin.

Vegna mjög jákvæðra undirtekta á open space vinnustofunni á Lean 2013 ráðstefnunni, höfum við ákveðið að blása til open space vinnustofu þar sem við bjóðum alla velkomna að mæta og taka þátt.
Þessi hugmynd kom reyndar fram á ráðstefnunni og við erum því bara að hrinda í framkvæmd einni af mörgum góðum hugmyndum sem urðu til á ráðstefnunni og open space vinnustofunni. Sjá nánar um open space nálgunina hér http://www.leanisland.is/um-opid-rymi/.

Við ætlum að vera í Marel föstudaginn 14. júní milli klukkan 15:00-18:00.

Hvetjum alla til að mæta og taka þátt í frekari hugarflæði um áhugaverðar hugmyndir sem tengjast lean og stöðugum umbótum almennt. Hlökkum til að sjá sem flesta.
Stjórn Lean faghópsins.