Fréttir og pistlar

Stjórnvísi býður fyrirtækið Hreint hjartanlega velkomið í Stjórnvísi.  Hreint var stofnað 12.desember 1983 og er ein elsta og stærsta ræstingarþjónusta landsins.  Hjá félaginu starfa nú 150 manns.  Aðalskrifstofan er í Kópavogi en starfssvæði fyrirtækisins er höfuðborgarsvæðið, Akureyri, Akranes, Selfoss og Hveragerði.  Þjónusta Hreint ehf. er fyrst og fremst reglulegar ræstingar fyrir fyrirtæki og stofnanir sem og sala á ýmissi tengdri vöru og þjónustu.  
Hreint ehf. er með vottun norræna umhverfismerkisins Svansins fyrir reglulegar ræstingar.  Unnið er eftir skipulögðu gæða-og umhverfisstjórnunarkerfi og er lögð áhersla á gæði í allri starfseminni til að tryggja ánægju viðskiptavina og annarra hagsmunaaðila í samræmi við gæða-og umhverfisstefnu félagsins.

Gæðastjórnunarhópur hélt í morgun vel sóttan fund í Landsvirkjun sem fjallaði um mikilvægi gæðastjórnunar.  Guðmundur S. Pétursson gæðastjóri Landsvirkjunar hélt áhugaverðan fyrirlestur um ISO 9001 og sagði að staðallinn ætti við öll fyrirtæki svo framarlega sem við getum svarað því hver varan okkar er og hver er viðskiptavinurinn.  Krafa staðalsins er sú að tryggja að viðskiptavinurinn sé ánægður. Landsvirkjun hefur frá árinu 1995 skráð ferla, árið 2003 fengu þeir fyrst vottun og árið 2006 var allt fyrirtækið vottað.  EFni frá fundinum verður birt í vef-Dropanum.

Þessi grein birtist í Viðskiptablaði Morgunblaðsins í morgun.  ISO 9001 stjórnunarstaðalinn er markvisst settur fram til að uppfylla væntingar viðskiptavina. Í staðlinum er ekki verið að fara fram á flókin ferli, heldur er verið að tryggja samræmi milli þeirra gæða sem boðin eru viðskiptavinum og stjórnun fyrirtækisins. Þjálfun starfsmanna og stjórnenda er skipulögð og unnin með hliðsjón af ánægju viðskiptavina, þ.e. stuðlað er að færni með það að markmiði að starfsmenn geti uppfyllt kröfur og væntingar viðskiptavina.
Þess er einnig krafist í staðlinum að fyrirtæki hafi eftirlitskerfi sem virkar og virkt úrbótaferli. Eitt algengasta verkfæri sem notað er við eftirlit er svokallaður Deming hringur, eða gæðahringur. Hann lýsir einfaldri aðferð til að greina upplýsingar áður en ákvarðanir eru teknar. Þannig má minnka líkur á mistökum í ákvörðunum eða úrlausnum.
Þessi stutta lýsing vekur vonandi forvitni þeirra sem geta hugsað sér að ná betri árangri í rekstri fyrirtækisins og efla stjórnun. Með því að fylgja kröfum staðalsins get ég fullyrt að betri árangur næst bæði hvað varðar rekstrarafkomu og í innra starfi.
Það er því ekki að ástæðulausu að stjórnun með ISO-stöðlum er elsti af 19 faghópum innan Stjórnvísi - stærsta stjórnunarfélags á Íslandi. Hægt er að sjá greinina í fullri lengd á í vef-Dropanum. http://www.stjornvisi.is/vef-dropinn/greinaraislensku/
 
Guðmundur S. Pétursson, gæðastjóri og stjórnarmaður í Stjórnvísi.
 

Stjórnvísi óskar eftir hugmyndum og tillögum frá félagsmönnum til að einfalda/breyta heimasíðunni www.stjornvisi.is   Heimasíðan er okkur mikilvæg til að auglýsa fundi, flytja fréttir, skoða efni frá fundum, skrá inn nýja félaga og skráningu á fundi svo eitthvað sé nefnt.  Við leituðm eftir aðila eða fyrirtæki sem er tilbúið til að taka þetta verkefni að sér.  Einnig óskum við eftir hugmyndum frá ykkur hvernig við getum bætt síðuna.  Að lokum viljum við hvetja ykkur til að senda inn fréttir sem eiga heima á síðunni okkar.   Ábendingar og hugmyndir óskast sendar til Gunnhildar á stjornvisi@stjornvisi.is
 

Lean faghópurinn hélt í morgun kynningu á VMS-töflum sem eru öflugt verkefnastjórnunartól sem sprottið er úr hugmyndafræði straumlínustjórnunar. Þórunn M. Óðinsdóttir kynnti hugmyndafræði taflanna, hvaða tilgang þær hefðu og hvernig hægt væri að nota þær á ýmsa vegu, t.d. á vikulegum fundum deilda/sviða, við verkefnastýringu á stærri afmörkuðum verkefnum og einnig í ákveðnum teymum þvert á svið og deildir.  Þá væru þær gott tæki t.d. til að auka samvinnu innan deilda og bæta upplýsingaflæði innan og milli deilda. Fjöldamargar spurningar komu um notkun taflanna og sköpuðust skemmtilegar umræður um verkefnastjórnun og upplýsingaflæði almennt, sýnileika verkefna, samvinnu innan hópa, eftirfylgni með verkefnum og árangursmælingar innan deilda. Augljóst er að VMS-töflurnar og vinnulagið í kringum þær geta hjálpað mikið til við þessa þætti þó áhersla væri á að taflan sjálf gerði ekki mikið nema ef vinnulagið í kringum hana væri fullinnleitt.  Fullbókað var á kynninguna og vegna mikils áhuga verður kynningin endurtekin miðvikudaginn 1. desember.

Stofnfundur faghóps um Sköpunargleði var haldinn í dag.  Formaður faghópsins Haraldur Diego hélt sögustund.  Hann sagði frá því hvernig sköpunargleði leiddi til þess að tjónum á bílum Dominos fækkaði um 70%.   Markmið nýja faghópsins er að hafa gaman að því að hittast og að stuðla að því og efla sköpunargleði í vinnunni.  Sköpunargleði eykur starfsánægju og því hærri sem starfsánægja er því meiri hagnaði skila fyrirtækin sem er allra hagur.   Baldur Gísli Jónsson framkvæmdastjóri starfsmannasviðs Landsbankans tók vel á móti gestum með nýbökuðu bakkelsi.  Hann kynnti ný gildi LÍ sem eru: "Við hlustum, lærum og þjónum".  LÍ fer nýjar leiðir í að kynna gildin, bæklingurinn "Heyrðu" kynnir fyrsta gildið en í honum er að finna fyrirlestraröð fyrir starfsmenn sem verður haldinn tvo fimmtudaga í mánuði fram á næsta sumar.  Fyrirlesarar í nóvember voru Þorvaldur Þorsteinsson "Hvað varstu að segja?" og Árelía Eydís Guðmundsdóttir "Eldurinn innra með: umfjöllum um hlustun eftir köllun í starfi".  Fundirnir eru haldnir á morgnana í Tjarnarbíó.

EFQM  líkanið sem stendur fyrir European Foundation for Quality Management eða Evrópska gæðastjórnunarfélagið er mest notaða aðferðafræðin til að veita fyrirtækjum gæðaverðlaun bæði hérlendis sem erlendis.   Líkanið skiptist í 9 einingar, hver eining skiptist síðan upp í fleiri einingar alls 32.   Í EFQM er mannauðurinn metinn út frá 5 lykilþáttum  1) Þróun mannauðs er markviss 2) Er til skrifleg starsmannastefna sem allir starfsmenn vita af og þekkja  3)  Er til áætlun um þróun 4) Er til Jafnréttisstefna 5) Eru gerðar viðhorfskannanir?   Starfsmenn eru virkir þátttakendur og hafa umboð til athafna.  Efni Sigurjóns og Guðnýar Önnu má sjá í vef-Dropanum

Ráðstefna á vegum Þjónustuhóps Stjórnvísi sem haldin var í HR í morgun var vel sótt.  Ragnar Þór Jónsson, forstjóri Öryggismiðstöðvarinnar sýndi fram á skýra fylgni milli ánægju viðskiptavina og starfsmanna með tölulegum upplýsingum.  Jón Þórir Frantzson forstjóri Íslenska gámafélagsins fjallaði um Græna gleði, Guðmundur Jóhann Jónsson, forstjóri Varðar tryggingar hf, fjallaði um hversu mikil vinna það er að halda sér í toppsæti og hve sigurinn er sætur, Einar S. Einarsson framkvæmdastjóri sölu-og þjónustusviðs ÁTVR ræddi um Þjónustumenningu og ánægju viðskiptavina og að lokum fór Dr. Árelía Eydís Guðmundsdóttir lektor við HÍ á kostum þegar hún ræddi um að það væru fylgjendur sem búa til leiðtoga.  Í dag vill fólk fá mannlega leiðtoga sem er eins og ég og þú.   Glærur frá ráðstefnunni munu birtast í vef-Dropanum.

Ávinningur af áhættugreiningu er sá að hún auðveldar ákvarðanatöku.  Áhættumat er ekki endapunktur áhættustýringar og því þarf að endurskoða reglulega hvort uppfær þurfi matsferlið svo það eigi við hverju sinni sagði Sigurvin Bárður Sigurjónsson, sérfræðingur á fyrirtækjasviði KPMG á fundinum í morgun.  Glærur af fundinum munu birtast fljótlega í vef-Dropanum.

Tímaritið Frjáls verslun birti í nýju tölublaði glæsilega umfjöllun um Haustráðstefnu Stjórnvísi sem haldin var á Grand hóteli 1.október síðastliðinn.  Greinina má sjá í heild sinni í vef-Dropanum
 

Hátt í hundrað manns sóttu ráðstefnuna Þekking er mesta verðmæti þjóðarinnar.  Tryggjum gæði í skólastarfinum með stjórnunarstöðlum.  Ráðstefnan var haldin þann 29.október sl. og var samstarf ISO-hóps Stjórnvísi og Endurmenntunar HÍ. 

Einstakt tækifæri til að sjá heimsþekkta fyrirlesara og sérfræðinga á sviði klasa og samkeppnishæfi á einum stað.  Undanfarna mánuði hefur farið fram viðamikil kortlagning á íslenska jarðvarmaklasanum.  Hinn heimsþekkti vísindamaður á sviði stjórnunar, Dr. Michael Porter, hefur leitt vinnuna og eru niðurstöður verkefnisins að verða ljósar.  Um þetta verkefni hefur myndast óvenju sterk samstaða og eru yfir 40 aðilar sem koma beint að verkefninu undir stjórn ráðgjafarfyrirtækisins Gekon auk fjölda annarra sem lagt hafa verkefninu lið.  Dagskrána í heild sinni má finna á heimasíðu ráðstefnunnar www.icelandgeothermal.is
 

Niðurstöður sex mastersverkefna voru kynntar á ráðstefnunni.  Það vakti áhuga að mannauðsstjórar eru í auknum mæli að taka að sér önnur verkefni t.d. markaðs-og kynningarmál á meðan vísbendingar koma um að þörfin fyrir sálgæslu og félagslegan stuðning hefur aldrei verið meiri.
Kynningarefni af ráðstefnunni verður birt fljótlega í vef-Dropanum.

Mikil gleði ríkti á fundi um sköpunargleði á vinnustað sem á annað hundrað manns sóttu í HR.  Fundargestir léku sér við að henda pesi í munn hvors annars og fékk sigurliðið "peskalla" að launum. Sjö frábærir fyrirlesarar fluttu erindi á fundinum og var meginþemað að lífinu skildum við lifa lifandi og stefna að því að hafa "happy hour" frá kl.08:00 - 17:00 alla virka daga í vinnunni.  Efni frá ráðstefnunni mun birtast innan tíðar í vef-Dropanum.

Fundargestir á Lean-fundi um umbótastefnu hjá Nóa-Síríus voru leystir út með sælgæti og boðið var upp á ljúffengt Nóa-konfekt á fundinum.  Þórunn M. Óðinsdóttir verkefnastjóri fór yfir hvaða leið var farin í umbótastefnu Nóa-Síríus.  Eitt verkefnanna var skilvirkni í vinnurýmum og voru allir starfsmenn látnir þarfagreina vinnusvæði sitt.  Í þessum breytingum lét forstjóri taka niður veggina á sinni skrifstofu og vinnur í dag í opnu rými.  Glærur af fundinum eru komnar í vef-Dropann.

Fundur í samstarfi Stjórnvísi, FVH og Fagráðs verður haldinn í Háskólanum í Reykjavík föstudaginn 15.október kl.15:00-17:00.  Þarna verða:  Samuel West, sálfræðingur og frumkvöðull frá Svíþjóð, Andri Heiðar Kristinsson frá Innovit, Margrét Pála Ólafsdóttir leikskólastjóri, Dóra Ísleifsdóttir frá Listaháskólanum, Ingibjörg Gréta Gísladóttir frá Hugmyndahúsinu, Gunnar Hólmasteinsson frá CLARA og Haraldur Diego frá Fagráði, viðskiptaráðgjöf.  Taktu daginn frá!

Mikil ánægja ríkir með Haustráðstefnu Stjórnvísi sem haldin var 1.október.  Á annað hundrað manns sóttu ráðstefnuna og hefur fjöldi manns haft samband við Stjórnvísi til að fá aðgang að glærum þeirra átta frábæru fyrirlesara sem þar fluttu framsögu.  Glærur þeirra sem gáfu leyfi til birtingar eru komnar í Vefdropann sem hefur að geyma allt efni frá fundum og ráðstefnum á vegum Stjórnvísi.

Stjórnvísi vill vekja athygli á áhugaverðri grein um sérhæfða þekkingu stjórnsýslufræðinga eftir Jón Egil Unndórsson í Vefdropanum. Í greininni leitar hann svara við því hvort nám í opinberri stjórnsýslu veiti rétt til ákveðinna starfa umfram aðra menntun.   -sjá Vefdropinn - íslenskar greinar
 

Upp úr öldudalnum.  Haustráðstefna STJÓRNVÍSI verður haldin á Grand hóteli 1.október kl.8:30 til 11:30.  Ráðstefnan ber yfirskriftina Upp úr öldudalnum.  Rætt verður um viðhorf til íslensks atvinnulífs, stöðu þess, áhugaverð sprotafyrirtæki og leiðir upp úr öldudalnum.  
Dagskrá:
Setning ráðstefnunnar: Margrét Reynisdóttir, formaður Stjórnvísi

Er lífið ljúft á botninum?  Benedikt Jóhannesson, framkvæmdastjóri Heims

Tækifærin eru víða - líka í kreppu.  Símon Þorleifsson, HRV verkfræðistofunni

Af sprotum sprettur framtíð
Eyþór Ívar Jónsson, framkvæmdastjóri Klaks
Margur er knár þótt hann sé smár.  Þórður Friðjónsson, forstjóri Nasdaq OMX Kauphallarinnar á Íslandi
Viðhorf erlendra lánadrottna.  Árni Tómasson, formaður skilanefndar Glitnis
Fatahönnun blómstrar.  Ásta Kristjánsdóttir, eigandi E-Label
Kaldi varð til í kreppunni.  Hvenrig var það gerð?  Agnes Sigurðardóttir, eigandi bjórverksmiðjunnar Kalda
Hvernig kreppan lék 300 stærstu fyrirtækin - hvað nú?  Jón G. Hauksson, ritstjóri Frjálsrar verslunar
Ráðstefnustjóri er Guðni Th. Jóhannesson sagnfræðingur.  Að loknum framsögum verða umræður. 
Skráning á www.stjornvisi.is  Aðgangseyrir er enginn. 
Félagsmenn í Stjórnvísi, forráðamenn fyrirtækja og áhugamenn um stjórnun og rekstur fyrirtækja eru innilega velkomnir.

Stjórnvísifélagar fengu einstaklega góðar móttökur í Vodafone í morgun.  Forstjóri Vodafone Ómar Svavarsson bauð gesti velkomna og þau Hrannar Pétursson upplýsingafulltrúi  og María Rún Hafliðadóttur fræðslustjóri  fjölluðu um innleiðingu nýrra gilda. Hjá Vodafone eru gildin ekki orð upp í vegg heldur verkfæri til að nota í öllum ákvörðunartökum. Það má segja að Vodafone hafi farið frekar óhefðbundnar leiðir við að kynna nýju gildi félagsins sem eru: Speed-Simplicity-Trust eða SST.   Öllum starfsmönnum bar boðið í Óperuna þar sem nýju gildin og markmiðin með þeim voru kynnt.  Þegar starfsmenn mættu til vinnu fengu þeir video-vél og  bjuggu í hópum til myndband um nýju gildin.  Myndböndin voru sýnd á jólahátíðinni við mikinn fögnuð.  Í páskaeggjum starfsmanna voru málshættir sem tengdust gildunum.