Fréttir og pistlar

Fólk fær í vöggugjöf ýmsa hæfileika en ólíklegt má telja að nokkur fæðist fullkominn stjórnandi. Jafnvel þeir sem afla sér stjórnunarmenntunar hafa enga tryggingu fyrir því að þeir nái árangri sem stjórnendur. Peter Drucker hélt því fram að þó fólk geti lært árangursríka stjórnun þá sé ekki hægt að kenna hana.
Fólk sem er að stíga sín fyrstu skref sem stjórnendur upplifir ýmsar áskoranir. Það ber ekki aðeins ábyrgð á sjálfu sér heldur þarf að útdeila verkefnum til annarra og bera ábyrgð á frammistöðu þeirra. Hugsa þarf lengra fram í tímann, móta stefnu, framtíðarsýn og setja markmið. Jafnvel þarf fólk að hætta sér inn á það jarðsprengjusvæði að stjórna fyrrum jafningjum. Ef fólk hefur ekki unnið sig upp innan fyrirtækisins er það samhliða þessu að kynnast nýju fólki og nýrri menningu á nýjum vinnustað.
Nýir stjórnendur sem fá tækifæri til að vinna með markþjálfa geta aukið mjög líkur sínar á að ná góðum árangri, jafnvel á stuttum tíma. Bæði aukast líkur á að þeim takist að forðast algeng byrjendamistök og líkur á að þeir læri af mistökum sínum. Markþjálfi getur veitt stjórnanda stuðning við að koma auga á og nýta styrkleika sína til að takast á við nýtt hlutverk og við að setja markmið, móta aðgerðir og koma þeim í framkvæmd.
Vitnisburður nýrra stjórnenda sem hafa unnið með markþjálfa staðfestir að þeim hefur tekist að efla sjálfstraust, gera fundi skilvirkari, eiga árangursríkari samskipti, veita skilvirkari endurgjöf og spara dýrmætan tíma sem telur hundruð klukkustundir á ári. Þeir meta það mikils að geta rætt við hlutlausan aðila sem þeir geta treyst. Sumir telja að án aðstoðar markþjálfa hefðu þeir gefist upp í nýju hlutverki og hætt störfum. Það getur verið tímafrekt og kostnaðarsamt að ráða og þjálfa nýja stjórnendur og því er mikið í húfi að vel takist til. Það gerir markþjálfun áhugaverðan valkost fyrir nýja stjórnendur.
Sigrún Þorleifsdóttir, stjórnendaþjálfari hjá Vendum ehf.

Jón Halldórsson framkvæmstjóri sölusviðs Olís bauð Stjórnvísifélaga velkomna í glæsileg húsarkynni eins elsta starfandi félags landsins Olís sem var stofnað 1927. Það kom mörgum á óvart að Olís er ekki eingöngu í orkusölu, þeir selja mikið til útgerðarinnar í landinu og reka verslunina Ellingsen og fyrirtækið Hátækni.

Jóhann Örn Ólafsson kynningarstjóri Bylgjunnar sagði okkur frá því að Bylgjulestin er búin að vera að ferðast um landi með það að markmiði að kynna hátíðir bæjarfélaganna. Bylgjan og Olís voru núna í sumar að fara fjórða árið í röð í sumarsamstarf. Sveppi sem er vinsælasta barnastjarna landsins var verður andlit Olís í þessum leik næstu tvö árin. Hemmi Gunn og Svansý eru á vaktinni á laugardögum á Bylgjunni og kynna gluggaleikinn sem felst í því að bæjarbúar setja Bylgjumiða í gluggann hjá sér þar sem Bylgjulestin er stödd og Svansý fer síðan og velur hús með miða. Bylgjan hefur merkt að hlustun hafi haldist stöðug og góð (mælingar frá Capacent) frá því sumarleikurinn með Olís hófst en hlustun átti það til að detta niður á sumrin.

Sigurður Pálsson (Diddi) forstöðumaður markaðssviðs Olís kynnti að í 18 ár hefur Olís verið með sumarleiki fyrir börn. Sumarleikurinn hófst með því að gefin var út bók fyrir krakka um hann Olla og í þeirri bók var einfaldur stimpilleikur. Stimpilleikurinn hefur breyst á þessum 18 árum og þróast. Vinningarnir eru núna hluti af vöruúrvali og hefur einfaldast mjög mikið. Leikurinn höfðar til fólks á öllum aldri því vikulega eru dregnar út úttektir á eldsneyti, vildarpunktar o.fl.

Áskorun Olís með tryggðarleiknum felst í að sannfæra viðskiptavininn um að koma inn á sínar stöðvar og það hefur tekist. Á þessu ári var skilað inn 20þús.fullstimpluðum kortum og afhentir 175.000þús. stimpilvinningar. Viðskiptavinir Olis eru þeir ánægðustu af Olíufélögunum þar sem boðið er upp á þjónustu skv. Íslensku ánægjuvoginni.

Myndir af fundinum: http://www.facebook.com/media/set/?set=a.215976691803622.54548.110576835676942&type=3

Þegar fasteign er metin er best að vanda til verka. Hvert herbergi er skoðað í krók og kima. Skápar og hillur eru opnuð, umhverfið kannað og kallað eftir ýmsum gögnum. Jafnvel fenginn sérfræðingur til aðstoðar.

Þegar meta á gæðastarf hjá fyrirtæki eða stofnun þarf líka að vanda til verka og skoða allar rekstrareiningar.

Flest lönd nota matslíkön, sem lýsa allri starfsemi, til að fá sem heilstæðast mat. Er þessi aðferð talin til bestu starfshátta. Hluti slíks líkans byggir á spurningum fyrir hvern rekstrarþátt sem gefa til kynna hvað þarf að vera til staðar til að ná sem bestum árangri.

Mest notaða matslíkan hjá fyrirtækjum í Evrópu nefnist EFQM líkanið og kemur frá „European Foundation for Quality Management“. Sambærilegt líkan fyrir stjórnsýsluna nefnist CAF líkanið (Common Assessment Framework) frá EIPA (European Institite of Public Administration). EFQM matslíkanið hefur lengi verið notað af fyrirtækjum og stofnunum á Íslandi. Hjá stjórnsýslu Evrópubandalagslanda er stuðst við CAF matslíkanið. Ennfremur er stuðst við það í stjórnsýslu margra annarra landa m.a. Noregs, Sviss,Tyrklands, Kína og Rússlands. Hafin er notkun á CAF matslíkani á Íslandi.

CAF líkanið byggir á EFQM líkaninu og eru þau nánast eins upp byggð en spurningarnar undir hverjum þætti eru ólíkar. Áherslan í spurningum EFQM matslíkansins höfðar til fyrirtækja en CAF til stjórnsýslunnar. Stjórnvísi veitti gæðaverðlaun þar sem EFQM matslíkanið var notað til að meta hvaða fyrirtæki eða stofnun stæði sig best á sama hátt og tíðkast í Evrópu. Verðlaunin virkuðu hvetjandi á fyrirtæki til að endurskoða og bæta starfshætti sína. Spennandi verður að fylgjast með hvaða áhrif CAF líkanið mun hafa á starfshætti íslenskrar stjórnsýslu.

Sigurjón Þór Árnason
Gæðastjóri Tryggingastofnunar

Kæru félagsmenn í Stjórnvísi.

Það er mjög ánægjulegt hve starfið í Stjórnvísi fer vel af stað í faghópum félagsins og þakka ég ykkur sérstaklega fyrir það.

Það er margt framundan hjá félaginu og faghópum.

Mig langar sérstaklega til að vekja athygli ykkar á 25 ára afmælisráðstefnu Stjórnvísi sem haldin verður milli kl. 16:00 og 19:00 hinn 27. október nk. í Natura, nýjum ráðstefnusal Icelandair-hótelsins við Reykjavíkurflugvöll; gamla Loftleiðahótelinu.

Þema ráðstefnunnar verður Ísland 2015 - forgangsverkefni stjórnandans.

Ráðstefnan er hugsuð sem framtíðarsýn á forgangsverkefni stjórnenda í íslensku atvinnulífi á næstu árum.

Ég hvet alla félagsmenn í Stjórnvísi til að mæta á ráðstefnuna sem verður hin glæsilegasta - en hún verður jafnframt 25 ára afmælishátíð félagsins.

Þetta verður sambland af fræðum og fögnuði.

Þekktir forstjórar úr atvinnulífinu halda fyrirlestra, fyrrrandi formenn Stjórnvísi verða heiðraðir, flutt verður hátíðarræða - auk þess sem boðið verður upp á skemmtiatriði og léttar veitingar þegar líða tekur á ráðstefnuna.

Sjáumst á þessari glæsilegu afmælisráðstefnu eftirmiðdaginn 27. október.

Með kveðju,
Jón G. Hauksson, formaður Stjórnvísi.

Mannlíf í miklum blóma
Á Akranesi er mannlíf í miklum blóma. Íbúar á Akranesi hafa aldrei verið fleiri og bærinn stækkar ört. Akranes er friðsæll og fallegur bær þar sem fjölskyldur geta búið sér sitt framtíðarheimili. Á Akranesi er einstaklega fjölskylduvænt og öruggt umhverfi þar sem áhersla er lögð á mikla og vandaða þjónustu við íbúa. Öflugt atvinnulíf sem býður upp á örugg störf á margvíslegum vettvangi, ásamt húsnæði á góðu verði, hefur orðið til þess að sífellt fleiri kjósa að búa á Akranesi. Menntun skiptir miklu máli og á Akranesi eru menntastofnanir í hæsta gæðaflokki eins og sannaðist svo vel þegar Grundaskóli á Akranesi fékk fyrstur grunnskóla Íslensku menntaverðlaunin. Leikskólar og framhaldsskóli eru einnig reknir af sama metnaði og grunnskólarnir. Á Akranesi er mikið og öflugt íþróttastarf og aðstaða til íþróttaiðkunar með því besta sem þekkist á Íslandi.

Sensa er þjónustufyrirtæki með sérfræðiþekkingu í netlausnum (e. Networking). Áhersla er lögð á að uppfylla sífellt vaxandi þörf íslenskra fyrirtækja og stofnana fyrir samskiptahætti og leiðir, sem uppfylla kröfur um áreiðanleika, öryggi og afköst.

Árangur í samkeppni byggir ekki síst á áreiðanlegum, skjótum og sveigjanlegum aðgangi að upplýsingum og öruggum samskiptum. Þróunin sýnir að samstreymi (e. Convergence) upplýsinga á hvaða formi sem er (t.d. tal, mynd, „gögn”) og lausnir sem að því snúa, eins og t.d. IP símalausnir, eru þegar orðin veigamikill þáttur í góðum árangri. Innra- og ytra netkerfi fyrirtækja skipa lykilhlutverk í að tryggja að svo megi vera.

Netkerfið og þær lausnir sem að því snúa, skila ekki hámarksárangri, sama hve miklu er varið í vél- og hugbúnað kerfisins, ef ekki er til staðar mikilvægur hlekkur; sérfræðingur í netlausnum, sem með þekkingu og reynslu tryggir að heildin vinni vel saman og hámarksárangur er tryggður.

Nýherji er eitt öflugasta upplýsingatæknifélag landsins en það hóf starfsemi sína þann 2. apríl 1992 með samruna IBM á Íslandi hf. og Skrifstofuvéla-Sund hf. Stofnendur voru IBM í Danmörku, Draupnissjóðurinn, Vogun hf., Óli Kr. Sigurðsson og nokkrir stjórnendur IBM á Íslandi.

IBM á Íslandi stofnað árið 1967

Þrátt fyrir ungan aldur á fyrirtækið sér djúpar rætur í íslensku viðskiptalífi. Forsaga Skrifstofuvéla-Sund hf. hófst t.a.m. árið 1899. Saga IBM á Íslandi hf. hófst með stofnun Skrifstofuvéla hf. árið 1946 en stofnandinn var Ottó A. Michelsen. Árið 1949 urðu Skrifstofuvélar hf. einkaumboðsaðili fyrir IBM hér á landi. IBM á Íslandi hf. var síðan stofnað sem sérstakt fyrirtæki í eigu IBM árið 1967. Skrifstofuvélar lögðu til helming af sínu starfsfólki og var Ottó A. Michelsen forstjóri fyrirtækisins allt til ársins 1982, þegar Gunnar M. Hansson tók við.

Lyfjastofnun er sjálfstæð stofnun sem heyrir undir velferðarráðuneytið. Hjá Lyfjastofnun eru flestir starfsmenn háskólamenntaðir og/eða með sérþekkingu á lyfjamálum. Krafist er fyllsta hlutleysis í störfum starfsmanna.

Á Lyfjastofnun er m.a. unnið að:

•mati á gæðum og öryggi lyfja
•eftirliti að kröfum heilbrigðisyfirvalda
•upplýsingagjöf fyrir heilbrigðisstéttir og almenning
•neytendavernd
Lyfjastofnun vill laða að sér vel menntað og metnaðarfullt starfsfólk og bjóða því góða aðstöðu til að þroskast í starfi.

Upplýsingaleki er þegar trúnaðarupplýsingar komast í hendur óviðeigandi aðila. Slíkt getur gerst af ýmsum ástæðum, hvort heldur sem er viljandi eða óviljandi, af völdum innri eða ytri aðila og óháð því hvort upplýsingar séu á rafrænu formi eða ekki.

Trúnaðarupplýsingar geta verið af mörgu tagi, svo sem viðskiptaáætlanir eða persónuupplýsingar. Upplýsingaleki getur haft óæskilegar afleiðingar í för með sér, svo sem beint fjárhagslegt tjón, lögsóknir eða skaðað orðspor.
Hvernig er hægt að bregðast við þessum áhættum á skilvirkan og markvissan hátt? Þegar búið er að skilgreina hvaða upplýsingar séu trúnaðarmál þarf að huga að því hvar þær eru geymdar, hvernig þær eru fluttar á milli staða, hverjir og hvernig þær eru notaðar. Notkun upplýsinga er orðin fjölbreyttari með aukinni útbreiðslu fjarvinnu og stóraukinni notkun á spjaldtölvum og snjallsímum.

Byggt á áhættumati og eftir greiningu á geymslu, flutningi og notkun upplýsinga þarf að grípa til viðeigandi úrbóta til að bregðast við þeim áhættum sem taldar eru óásættanlegar. Slíkar úrbætur geta verið af ýmsu tagi og ekki allar tæknilegar.
Huga þarf að þætti þeirra einstaklinga sem koma að geymslu, notkun eða flutningi upplýsinga auk þess að þeir hafi þau úrræði sem nauðsynleg eru til að meðhöndla trúnaðarupplýsingar á öruggan hátt.
Að mörgu er að hyggja til að takmarka áhættu vegna upplýsingaleka. Velja þarf réttu úrræðin til að verja fjármunum á sem hagkvæmastan hátt. Nauðsynleg forsenda þess er greining á gagnaflæði trúnaðarupplýsinga og áhættumat til að forgangsraða aðgerðum. Varasamt getur verið að innleiða öryggisúrræði án slíks undirbúnings þar sem illa ígrunduð öryggisúrræði geta valdið því að notendur fari að leita nýrra og óöruggari leiða til að komast hjá þeim öryggisúrræðum sem eru til staðar.

Tryggvi R. Jónsson, CISA
Höfundur er liðsstjóri Áhættuþjónustu Deloitte á Íslandi
og sérfræðingur í upplýsingaöryggi.

Á aðalfundi faghóps um ISO sem haldinn var á Neyðarlínunni í morgun var rædd dagskrá vetrarins ásamt því að kosin var ný stjórn. Einnig var farið yfir markmið, hlutverk og stefnu ISO faghópsins sem er að vera með umfjöllun um þau málefni sem forsvarsmenn ISO vottaðra fyrirtækja eða þeirra sem eru með þroskuð gæðakerfi eru að fást við hverju sinni. Hugmyndir að dagskrá voru m.a.:
Hvernig lfiir gæðakerfi af breytingar í/á fyrirtækjum - umræðufundur
Samþætting stjórnkerfa hjá Alcoa
Kynning á útskriftarverkefnum nemenda í gæðastjórnun o.fl.
Stjórn ISO hvetur félaga til að koma með hugmyndir að áhugaverðum fundum og þakkar Svölu Rún Sigurðardóttur hjartanlega fyrir stjórnarsetu í hópnum og býður Guðmund S. Pétursson gæðastjóra Landsvirkjunar velkominn í stjórn hópsins á nýjan leik.

Við höfum sett myndir af fundinum hjá CCP inn á Facebook síðuna okkar. Slóðin er: http://www.facebook.com/media/set/?set=a.153479861386639.38829.110576835676942&type=1

Á faghópi Hugbúnaðarprófana í morgun hjá Símanum kynnti Stefán Freyr Harðarson kafbátaverkefni sem hlaut 4.sæti í aðalúrslitum í San Diego sem er stórkostlegur árangur. Kafbátaverkefnið er þverfaglegt verkefni í Háskólanum í Reykjavík sem hófst á haustönn 2009 en þá fóru fjórir nemendur af stað í verkfræðideild HR með verkefnið. Að vori 2010 fæddist Keikó og keppti í þessari sömu keppni. Keikó hlaut "Þrjóskuverðlaunin 2010" því þrátt fyrir að leki kæmi upp í bátnum gafst liðið aldeilis ekki upp. Árið 2011 þegar kafbáturinn Freyja var sendur í keppnina kom einnig upp leki og eins og áður sagði hafnaði liðið í 4.sæti í aðalúrslitum. Liðinu dreymir um að komast úr árið 2012 og leitar að styrktaraðilum.

ELLA - gæði og virðing.
Fágun, virðing og ábyrgð eru einkunnarorð ELLU - sem er framleiðslufyrirtæki er vinnur eftir hugmyndafræði "Slow Fashion". Fyrirtækið var búið til af Elínrós Líndal, sem starfar einnig sem listrænn stjórnandi þess. En yfirhönnuður fyrirtækisins er Katrín María Káradóttir.

Við hugsum um viðskiptavin ELLU - þig - og hvernig við getum búið til fatnað sem ýtir undir kvenlega fegurð þína og sjálfstæði.

Fyrirtæki líkt og ELLA sem fjárfestir í gæðum, eru í þeim forréttindahóp að vinna með klassíska hönnun og þess vegna ekki í stöðugri keppni við síbreytileika tískunnar.

Að tilheyra ,,Slow Fashion" þýðir að huga að sínu nánasta umhverfi með virðingu í huga. Virðingu fyrir starfsfólkinu er sýnd með því að huga að góðu starfsumhverfi og mannsæmandi launum. Virðing fyrir umhverfinu er sýnd með því að búa til fatnað sem stenst tímans tönn og svo berum við mikla virðingu fyrir þér - viðskiptavini okkar.

Það er ELLA.

Ásgeir Jónsson stofnaði fyrirtækið Takmarkalaust Líf ehf. á vormánuðum árið 2011. Fyrir þann tíma hafði hann starfað hjá Ölgerðinni Agli Skallagrímssyni.

Það hafði verið draumur Ásgeirs í þó nokkurn tíma að stofna eigið fyrirtæki sem hefði meðal annars að markmiði sínu að auka lífsgæði fólks með því að kynna það fyrir jákvæðri sýn á lífið og tilveruna og sýna því framá hvað það eitt að breyta viðhorfi okkar getur breytt líðan okkar.

Í störfum sínum hefur Ásgeir öðlast mikla stjórnunarreynslu og nýtir hann hana í þeim námskeiðum sínum sem lúta að stjórnun fólks, tíma- og fundarstjórnun svo eitthvað sé nefnt.

is-Prject smíðar flóknar veflausnir því þær eru þeira ær og kýr. is-Project veitir einstaklingum, fyrirtækjum og stofnunum bestu fáanlegu veflausnir sem henta hverjum og einum. Því hver og einn er einstakur!

Oft á tíðum eru veflausnir einstakra fyrirtækja það flóknar, að ekki er hægt að kaupa tilbúnar lausnir beint úr kassanum. Oft er um að ræða flókna gagnaöflun eða birtingu gagna, hafa þarf samskipti við önnur kerfi, eða lausnin á einn eða annan hátt ekki augljós.

Jafnvel þótt fyrirtækið sé ungt er reynsla starfsmanna þess mikil. Báðir forritararnir hafa unnið í mörg ár við hönnun á flóknum veflausnum og því vel í stakk búnir til að takast á við hvert það verkefni sem rekur á fjörur þeirra.

Ekkert verkefni er það flókið að á þeim finnist ekki lausn. Við hvetjum þig til að hafa samband við okkur í síma: 847-7653 eða í tölvupósti: hilmar@is-project.org, nú eða líta við á skrifstofu okkar að Ingólfsstræti 5, 3ju hæð. Hjá okkur er alltaf heitt á könnunni og við tökum vel á móti þér

Tern System var stofnað haustið 1997 af Kerfisverkfræðistofu Háskóla Íslands og Flugmálastjórn Íslands og byggðist reksturinn á tveggja áratuga samstarfsvinnu þessara aðila við þróun, rannsóknir og hvers konar þekkingaröflun á sviði flugstjórnar- og flugleiðsögutækni.

Upphaflegur tilgangur stofnun Flugkerfa var að taka við þróunarstarfsemi sem vaxið hafði upp á sviði flugstjórnartækni. Í ársbyrjun 2007 þegar ábyrgð á rekstri flugvalla-, flugleiðsögu- og flugumferðarþjónustu færðist í hendur Flugstoða færðist eignarhlutur Flugmálastjórnar yfir til Flugstoða og er Háskóli Íslands áfram hluthafi. 1. maí 2010 færðist svo hlutur Flugstoða til Isavia.

Tern Systems sérhæfir sig í kerfislausnum sem lúta að flugumferðarstjórn. Markmið fyrirtækisins hefur frá upphafi verið að efla rannsóknir, þróun og þekkingaröflun á sviði flugsamgöngutækni.

Tern Systems, Flugstoðir og Háskóli Íslands hafa alla tíð starfað saman að ýmsum þróunarverkefnum fyrir flugmálayfirvöld og hafa veitt sérfræðiþjónustu sem snýr að þessum málaflokkum. Þessi samvinna hefur leitt af sér samstarfsverkefni víða um heim. Þar má nefna rannsóknarsamstarf með ýmsum fyrirtækjum og stofnunum innan Evrópu, sem fjármögnuð hafa verið af Evrópuráðinu.

Tern Systems hefur unnið að þróun kerfislausna fyrir flugstjórn. Um er að ræða lausnir sem notaðar eru í rekstri flugstjórnarmiðstöðva, flugturna og við þjálfun flugumferðarstjóra. Kerfi frá Tern Systems eru meðal annars notuð á Íslandi, Írlandi, Suður-Kóreu, Sýrlandi, Namibíu og Indónesíu.

Það hefur færst í vöxt að mannauðsstjórar fyrirtækja útbúi stjórnendahandbækur fyrir stjórnendur fyrirtækja. Flestar stjórnendahandbækur eru í dag í formi stjórnendavefja. Markmið handbókanna er að tryggja að allar upplýsingar sem stjórnandinn þarf á að halda séu á einum stað og að allir séu í takt þvert yfir fyrirtækið.
En hvað er stjórnendahandbók og hvað inniheldur hún?
Stjórnendahandbókin er verkfærakista stjórnandans og ómissandi fyrir nýjan stjórnanda. Hún hefur að geyma hvert hlutverk stjórnandans er sem er fjölþætt; hann ber ábyrgð á innkaupum, hagmálum, fjármálum, mannauðsmálum, upplýsingatækni og fjármálum.
Til að þarfagreina hvað stjórnendahandbókin á að innihalda er gott að fara þá leið að biðja stjórnendur að þarfagreina - hvað viltu sjá í stjórnendahandbókinni?
Þarfagreiningar hafa sýnt að stjórnendur vilja sjá ferli og fræðsluefni. Einnig óska þeir eftir að hafa í sinni stjórnendagátt upplýsingar um áætlun og rauntölur, upplýsingar um þá starfsmenn sem heyra undir þá eins og fjölda, stöðugildi, kynjaskiptingu, upplýsingar um laun, yfirvinnu, veikindi, menntun, fræðslu og starfsánægju. Stjórnendahandbókin gefur því stjórnandanum góðar upplýsingar um þann mannskap sem hann er ábyrgur fyrir og þá mælikvarða sem hann á að nota og eykur öryggi því ekki er verið að senda viðkvæmar upplýsingar í tölvupóstum. Þar er líka sett inn efni eins og stjórnendafræðsla, leiðbeiningar, spurt og svarað, áhugaverðar greinar og tenglar. Stjórnendhandbókin er því sannkölluð verkfærakista stjórnandans.
Gunnhildur Arnardóttir
Framkvæmdastjóri Stjórnvísi

Haustráðstefna VSF verður haldin í Truningum Kópaovogi 22.september 2011. Ráðstefnan er hálfan dag og hefst klukkan 13:00.
Yfirskrift ráðstefnunnar er Verkefnateymið og kostnaðarstýring eða Project Team Management & Cost Enigneering og eru fyrirlesarar úr hinum ýmsu geirum atvinnulífsins með fjölbreyttan bakgrunn og reynslu sem þeir deila með ráðstefnugestum. Allar nánari upplýsingar um ráðstefnuna má sjá á www.verkefnastjórnun.is

Mannvirkjastofnun tók til starfa þann 1. Janúar 2011. Hún starfar skv. lögum nr. 160/2010. Stofnunin skal tryggja samræmingu á byggingar- og eldvarnareftirliti og starfsemi slökkviliða í samráði við viðkomandi stjórnvöld og hafa yfirumsjón með rafmagnsöryggismálum. Meðal helstu verkefna Mannvirkjastofnunar eru:

1. að annast gerð leiðbeininga, verklagsreglna og skoðunarhandbóka á fagsviði stofnunarinnar í samráði við Samband íslenskra sveitarfélaga og aðra hagsmunaaðila,

2. að bera ábyrgð á markaðseftirliti með byggingarvörum,

3. að annast aðgengismál,

4. að hafa eftirlit með vörnum gegn hættu og tjóni af raforkuvirkjum, neysluveitum og rafföngum og truflunum af þeirra völdum o.fl.

Felur kvörtun í sér verðmæti?

Viðskiptavinur er óánægður ef hann upplifir þjónustu undir væntingum og sýna flestar kannanir að fæstir kvarta með formlegum hætti. Að kvarta kostar tíma og fyrirhöfn og oft vita viðskiptavinir ekki hvar á að koma kvörtunum á framfæri. Þeir sem láta þjónustuveitanda ekki vita af óánægju sinni eru líklegri til að segja vinum og vandamönnum frá og geta margföldunaráhrif slíkrar umræðu orðið veruleg. Sumir túlka hugtakið kvörtun á neikvæðan hátt, en í raun á það fremur skylt við jákvæð hugtök, endurgjöf, ábendingu, ráðgjöf o.s.frv. Sá sem leggur fram kvörtun er að standa vörð um réttindi sín. Hann fer ýmist fram á leiðréttingu á umræddum mistökum, skaðabætur eða vill einfaldlega koma ábendingu á framfæri. Vel framsett kvörtun eykur líkur á farsælli úrlausn. Æskilegt er að kvörtun sé hnitmiðuð, að hún lýsi helstu staðreyndum máls og skýrt sé hverjar væntingar um úrlausn eru. Mikilvægt er að sá sem kvartar dragi ekki úr mikilvægi kvörtunarinnar því hann er að gera þjónustuveitandanum greiða. Þjónustuveitandi sem tekur faglega á móti kvörtunum og hefur gott aðgengi fyrir slík erindi gefst tækifæri til að bæta fyrir það sem miður fer. Ef viðskiptavini er gert erfitt fyrir að koma kvörtun á framfæri eru meiri líkur á að óánægja hans aukist, hann gefist upp og segi öðrum frá upplifun sinni.Kvörtun getur falið í sér mikil verðmæti ef hún er meðhöndluð rétt. Með faglegri meðhöndlun kvörtunar nær þjónustuveitandi að koma í veg fyrir frekari skaða, gera óánægðan viðskiptavin ánægðan og læra af mistökum. Að taka fagnandi á móti kvörtun og leysa hana á farsælan hátt felur í sér þau verðmæti að þjónustuveitandinn stendur uppi með ánægðan og tryggan viðskiptavin og bætt þjónustustig