Forvarnir eru besta tryggingin sögðu þau Auður Daníelsdóttir og Guðmundur Ingi Þorsteinsson á Tjónasviði Sjóvá þegar Stjórnvísifélagar heimsóttu fyrirtækið. Í samdrætti eru miklu færri tjón og Sjóvá hefur aldrei séð jafn fá tjón og í dsember 2012. Ástæðuna má rekja til góðrar tíðar. Sjóvá leggur mikla áherslu á samskipti við birgja þar sem birgjarnir eru framlenging á fyrirtækinu. Hrós frá viðskiptavinum er vel nýtt og komið á framfæri til starfsmanna. Hjá Sjóvá er viðskiptavinurinn í öndvegi. Sjóvá fær starfsmenn til að hugsa af hverju þau gera hlutina eins og þeir gera, get ég gert þetta einhvern veginn öðruvísi? Verkefnatöflur VMS voru innleiddar á síðasta ári og hafa þær veitt vettvang til að sjá hvað er í gangi. Frábær mæting var á fundinn og efni/glærur eru komnar á innrivef Stjórnvísi.

Heilbrigðishópur fékk Inga Steinar Ingason verkefnisstjóra rafrænnar sjúkraskrár hjá Embætti Landlæknis (EL) til að koma og fjalla um stöðuna í rafrænni sjúkraskrá, þá vinnu sem er búið að leggja í rafræna sjúkraskrá og það sem framundan er í auknum aðgangi að gögnum milli stofnana innan heilbrigðiskerfisins.
Margir áhugaverðir punktar komu m.a. á að auka aðgengi lækna að lyfjagagnagrunni EL, einnig að vænst er nýrrar útgáfa af Sögu (rafræn sjúkraskrá) nú í febrúar og að unnið er að því að koma á uppflettimöguleikum milli stofnana. Nú er íslenska ríkið orðið eigandi ,,Heklu" og mun stuðla að fullri innleiðingu rafrænna lyfseðla.
Mörg önnur verkefni eru í vinnslu og hefur Velferðaráðuneytið jafnvel skoðað möguleikana á kaupum á heildstæðu sjúkraskrákerfi, en það er áætlað að kosti allt á bilinu 6-12 milljarða króna. Ekki hefur verið tekin formleg ákvörðun um neitt slíkt og því verður áfram unnið með Sögu-kerfið og samþættingu þess milli svæða amk. næstu 3 árin. Uppfærslum á Sögu verður fylgt eftir af starfsmönnum EL sem munu leggja áherslu á samræmi í skráningu.

Fundurinn var haldinn á Landsspítala og var mætingin góð eða um 70 manns.

Skipulag og framkvæmd þjónustu reynist mörgum fyrirtækjum og stofnunum erfiður ljár í þúfu, er Það er ekki síst vegna eiginleika og eðli þjónustu. Þjónusta er óáþreifanleg og framreiðsla hennar á sér stað í rauntíma, með þátttöku bæði starfsfólks og viðskiptavina. Þannig er nær ógerlegt að prófa þjónustuna fyrirfram. Einmitt af þessum sökum er mikilvægt að skipuleggja og kortleggja þjónustuþætti eins og hver á að gera hvað, hvar, hvenær, hvernig og ekki síst hvað á að gera þegar eitthvað fer úrskeiðis.

Það þykir vænlegra til árangurs að skipuleggja þjónustu til að mæta þörfum viðskiptavina, frekar en að mæta einungis þörfum rekstrareininga. Þegar upp er staðið eru það viðskiptavinir sem borga launin og eru þeir líklegri til að gera það aftur, ef þjónustan uppfyllir þarfir eða fer fram úr væntingum þeirra. Við skipulag þjónustu ætti því að hafa eftirfarandi í huga.

-Vita þarfir viðskiptavina og skilja hvað skiptir þá máli.
-Hanna, teikna upp og skipuleggja þjónustuþætti út frá þörfum viðskiptavina.
-Ýta undir rétta færni og viðhorf hjá starfsfólki til að framkvæma þjónustuþættina.
-Lofa viðskiptavinum aðeins því sem hægt er að standa við.

Að uppfylla þarfir viðskiptavina með því að bæta gæði þjónustu getur skapað fyrirtækjum auknar tekjur og jafnvel samkeppnisforskot. Það þarf þó alls ekki að vera kostnaðarsamara en hönnun þjónustu án tillits til þarfa viðskiptavina. Þvert á móti getur vel útfærð þjónusta sem tekur mið af þörfum viðskiptavina, hjálpað til við að lækka kostnað með aukinni skilvirkni og fókus á það sem skiptir máli. Þetta á við um allar rekstrareiningar, hvort sem er á samkeppnismarkaði eða ekki.

Magnús Haukur Ásgeirsson Viðskiptaráðgjafi Dögun Capital

Kæru félagsmenn.
Ég vil byrja á að óska ykkur gleðilegs og kraftmikils árs. Árið fer vel af stað í félaginu og þegar í þessari viku eru tveir áhugaverðir og vel sóttir fundir.
Eftir hálfan mánuð, 24. janúar, er fundur á veitingastaðnum Nauthól sem mig langar að vekja athygli ykkar á. Það er fundur stjórnar með stjórnum faghópa þar sem farið verður yfir verkefni og hugmyndir allra faghópa á vormánuðum.

Þessir fundir hafa tekist afskaplega vel og sl. haust mættu um 90 manns og tóku virkan þátt í umræðum. Allir félagsmenn eru velkomnir - og hvet ég sem flesta til að mæta og taka púlsinn á starfinu.

Innan raða Stjórnvísi eru núna yfir 2 þúsund félagsmenn og um 300 fyrirtæki. Svo margir hafa aldrei áður verið í félaginu og er Stjórnvísi stærsta og fjölmennasta stjórnunarfélag landsins.

Faghóparnir eru félagið. Þess vegna er það helsta verkefni stjórnar að halda vel utan um faghópana, hvetja þá til dáða en gæta þess að þeir haldi sjálfstæði sínu og frumkvæði. Stjórnvísi verður 27 ára á þessu ári og dafnar vel. Það er í harðri samkeppni við nokkur önnur félög, t.d. Dokkuna, og er sú samkeppni af hinu góða. Í þeirri samkeppni bið ég þó félagsmenn og forráðamenn fyrirtækja að hafa í huga að Stjórnvísi er áhugamannafélag í eigu félagsmanna og starfar ekki með fjárhagslegan ágóða í huga.

Markmið félagsins er að efla faglegar umræður um stjórnun - og fylgjast náið með nýjum straumum og stefnum í samvinnu við atvinnulífið og háskólaumhverfið; sem og að skerpa á gömlum og góðum gildum í stjórnun.

Það verður margt um að vera næstu vikur og mánuði og fyllsta ástæða til að fylgjast vel með og missa ekki af frjóum fundum og fljúgandi hugmyndum. Stjórnunarverðlaun Stjórnvísi verða veitt í fjórða sinn í mars næstkomandi. Hátíðin er einn af hápunktum starfsins og verðlaunin hafa fest sig í sessi í viðskiptalífinu. Forseti Íslands hefur frá upphafi afhent þau og flutt áhugaverða tölu í tilefni þeirra.
Við í stjórn Stjórnvísi höfum haldið því að forráðamönnum fyrirtækja að þátttaka starfsmanna þeirra í félaginu sé hagstæðasta símenntunin á markaðnum og gefi færi á hagnýtri umræðu um stjórnun og raunhæfum viðfangsefnum.

Eflum félagsvitundina og verum öll stolt af því að vera félagar í Stjórnvísi. Ég er í Stjórnvísi, er setningin. Hvetjum alla til að hoppa á vagninn og ferðast með okkur um heim praktískra stjórnunarfræða.

Höfum eldmóð og bjartsýni ávallt að leiðarljósi í starfi sem einkalífi og heilsum árinu 2013 í góðum félagsskap.

Með kveðju,
Jón G. Hauksson, formaður Stjórnvísi.

Stjórn Stjórnvísi óskar þér og fjölskyldu þinni gleðilegra jóla.
Við þökkum samstarfið á árinu og hlökkum til að takast á við
ný og spennandi verkefni með þér á komandi ári.
Stjórn Stjórnvísi.

Yfir 90% af fyrirtækjum landsins eru ör- eða lítil fyrirtæki. Allt of algengt er að stjórnendur þeirra vanmeti þann tíma og kostnað sem felst í fjármálum fyrirtækisins. Þar sem bókhaldið snýr ekki að framleiðslunni sjálfri, telst það oft sem óþarfa kostnaður - sem gæti ekki verið lengra frá sannleikanum. Enda eru fjármálin jú lífæð og kompás rekstursins.

Ekki falla í þá gryfju að láta fjármálin sitja á hakanum! Þó er það ekkert nema mannlegt að fresta því sem manni finnst óþægilegt og jafnvel leiðinlegt. Eitt skothelt ráð við þessu er að eyrnamerkja sérstakan tíma í viku/mánuðinum fjármálunum. Búa sér til fastan tíma þar sem maður raðar saman nótum, fer yfir stöðu lánadrottna og viðskiptamanna. Láta dagatalið minna sig á það og taka frá tímann. Best er að gera þetta á viku eða mánaðarfresti þannig að útgjöldin séu ennþá fersk í minninu. Það er miklu tímafrekara og erfiðara að láta þessa hluti safnast upp, því hver man í desember hvað gerðist í janúar?!

Með réttu skipulagi geta stjórnendur lítilla fyrirtækja einnig sparað sér hundruðir þúsunda á ári í bókhaldskostnað - svo ekki sé talað um óþarfa áhyggjur. Algengast er að bókarar rukki eftir tímakerfi og því er mikilvægt að skila gögnunum rétt af sér. Athugaðu að bókarar lesa ekki hugsanir og koma því til með að rukka ykkur fyrir þann tíma sem fer í að finna skýringar, sem maður hefði svo auðveldlega getað leyst með því að skilja eftir viðeigandi skýringar í gögnunum.

Með því að taka bókhaldinu fastari tökum get ég lofað þér að fyrirtækið þitt á eftir að spara sér ómældan kostnað í bókhaldið og hver veit nema þú sparir þér nokkur grá hár á nýju rekstarári og öðlist loks hugarró gagnvart fjármálunum.

Brynhildur S. Björnsdóttir

Höfundur er framkvæmdastjóri Hagsýn bókhalds- og rekstrarþjónustu og M.Sc. í Viðskiptafræði (stjórnun og stefnumótun).

Nýlega funduðu stjórn, fagráð og skoðunarmenn Stjórnvísi. Markmiðið með fundinum í sambland við að eiga saman góða stund og njóta aðventunnar var að fá sýn og fagleg ráð frá fagráði og skoðunarmönnum hvernig styrkja mætti enn frekar sterka stöðu félagsins. Hlutverk fagráðs er fyrst og fremst að vera ráðgefandi fyrir stjórn félagsins varðandi stefnumótandi áherslur og að taka þátt í að efla ímynd og orðspor Stjórnvísi. Jafnframt að vera félaginu innan handar varðandi faglega stjórnunarþekkingu og aðstoð við einstök verkefni. Fagráð og skoðunarmenn félagsins er skipað miklum reynsluboltum sem hafa unnið mikið og gott starf fyrir Stjórnvísi.

Á myndinni eru frá vinstri; Davíð Lúðvíksson, Arney Einarsdóttir, Kristinn Tryggvi Gunnarsson, Unnur Valborg Hilmarsdóttir, Bára Sigurðardóttir, Auður Þórhallsdóttir og Kristín Kalmansdóttir

Ánægja starfsmanna: Það er gott að gefa af sér.
Því er jafnan haldið fram, að þátttaka fyrirtækja í samfélagslegum verkefnum sé jákvæð fyrir ímynd fyrirtækisins. Minna hefur verið rætt og ritað um þá ánægju sem starfsmenn fyrirtækja fá af því að leggja sitt af mörkum, en víða eru vísbendingar um að hún sé umtalsverð og bæti vinnuandann á hverjum stað.

Vodafone í Bretlandi hefur um nokkurra ára skeið stutt sitt starfsfólk til að vinna að góðgerðarmáli að eigin vali. Reynslan af því er afar góð, því ánægja starfsfólks hefur mælst hærri í kjölfarið og hollusta við fyrirtækið hefur aukist.

Hér á landi hefur Vodafone um árabil tekið þátt í Degi rauða nefsins, fjáröflunarverkefni UNICEF á Íslandi. Auk þess að annast tæknilega framkvæmd verja starfsmenn Vodafone hundruðum klukkustunda í undirbúning og vinnu við símsvörun á deginum sjálfum. Þegar samstarf Vodafone og UNICEF hófst þurfti fyrirtækið að meta hvort kostnaðurinn og álagið sem fylgir verkefninu væri fyrirhafnarinnar virði. Eftir nokkurra ára samstarf er niðurstaðan afdráttarlaus - það er gott að gefa af sér og starfsfólk hefur mikinn áhuga á að taka þátt. Þannig eru þeir jafnan fljótir að skrá sig til þátttöku sem hafa áður tekið þátt og gildir þá einu hvort vinnuálag á viðkomandi hafi verið mikið eður ei. Við erum stolt af því að taka þátt, bæði sem einstaklingar og heild.
Í mannauðsfræðunum er rík áhersla lögð á mikilvægi þess að ráðningar, fræðsla, starfsþróun, starfslok og annað styðji við viðskiptastefnu hvers fyrirtækis. Minni áhersla hefur hins vegar verið á ýmsa innri þætti í rekstrinum, t.d. viðburðarstýringu, markaðssetningu innan fyrirtækjanna sjálfra á innri þjónustu, vörum og ólíkum hlutverkum í stórri heild. Reynsla okkar af því að reyna að samþætta innri og ytri markaðssetningu er ekki aðeins jákvæð, heldur gegnir slík samþætting lykilhlutverki í því að auka ánægju starfsmanna.

Sonja M. Scott
Starfsmannastjóri Vodafone

7 lyklar að árangri í ríkisrekstri
Í fyrri greininni í síðustu viku var fjallað um mikilvægi þess að (1) löggjöf endurspegli forgangsröðuð verkefna sem rúmast innan fjárlaga. (2) Kröfunnar til ráðuneyta um trausta, opna og vandaða stjórnsýslu. Samið verði við stofnanir um lykilverkefni, þjónustustig og árangur. (3) Forstöðumaðurinn er í miðri hringiðunni og skapar liðsheildina sem hefur hæfni, getu og vilja til að leysa verkefnin betur í dag en í gær. Seinni 4 lyklarnir eru:

4. Stefnan, gildin og framtíðarsýn er skýr. Starfsmenn taka virkan þátt. Lifandi stefnur um mannauð, þjónustu, öryggi o.fl. Gildin virk. Hlutverkið vel skilgreint, hver eru forgangsverkefnin og hvert stefnt er til framtíðar og hvernig.
5. Auðlindir rétt samsettar. Mannauðurinn er dýrmætasta „eignin“. Með símenntun, samvinnu og þekkingarmiðlun er auðurinn aukinn. Með virkum samskiptum við viðskiptavini og hagsmunaaðila er verkefnum forgangsraðað. Rétt samsetning á hæfni og tækni nýtt til að veita betri þjónustu.
6. Nýsköpun og endurbætur. Skapa þarf umbótamenningu og samvinnu innan stofnana og milli stofnana/ráðuneyta. Þar er stöðug leit að þekkingu, betri ferlum og nýrri tækni beitt til að leysa verkefnin á hagkvæmari hátt í dag en í gær.
7. Opin gagnsæ stjórnsýsla - gagnvirk samskipti við borgarana. Tryggja gott aðgengi að samræmdum upplýsingum um; megin verkefni , hvað kosta þau, hverjir vinna að þeim, hvað segja viðskiptavinir um þjónustuna og starfsmenn um stöðuna. Bent er á skýrslu undirritaðs frá 2011 um þetta efni og CAF líkanið. Sjá grein á www.stjornvisi.is
   Lögð er áhersla á að allar stofnanir birti samræmdar upplýsingar um megin verkefni, kostnað og árangur. Samspil allra lyklanna þarf að vera stöðugt sem leiðir til betri forgangsröðunar verkefna. Traust, opin og skilvirk stjórnsýsla eykur lífsgæði og samkeppnishæfni Íslands.

Þorvaldur Ingi Jónsson, ráðgjafi, viðskiptafræðingur, Ms í stjórnun- og stefnumótun. Stjórnarmaður í Stjórnvísi

Urta Islandica er jurtahönnunarfyrirtæki sem hannar, framleiðir og selur matvöru og matargjafavöru út íslenskum jurtum. Við seljum í heildsölu til annarra verslana, seljum vörurnar okkar á vefsíðunni urta.is og einnig í verslun okkar að Austurgötu 47 í Hafnarfirði þar sem framleiðslan fer einnig fram. Fyritækið hefur verið í undirbúningi frá því í byrjun árs 2009 en kom fyrst með vörur á markað í október 2010. Þóra Þórisdóttir myndlistarmaður er aðaleigandi, hönnuður og hugmyndafræðingur fyrirtækisins og er með fimm fasta starfsmenn á launaskrá. Urta Islandica pakkar íslenskum jurtum og jurtablöndum í tepoka, framleiðir jurtasýróp, jurtakryddsalt og smávegis af sultum. Stefna urta islandica er að framleiða sanngjarna og sjálfbæra vöru þar sem allir sem að framleiðslunni koma fái sanngjarnan skerf af söluverði vörunnar. Þannig viljum við ekki pressa niður verð á jurtum og berjum frá tínslufólkinu okkar sem kemur alls staðar af landinu né reka láglaunastefnu í framleiðslunni. Hráefnið í vörurnar okkar samanstendur að miklu leyti af villtum íslenskum jurtum og berjum. Urta Islandica er í samstarfi við aðra aðila á Íslandi sem framleiða vörur úr íslenskum jurtum og ber þar hæst samvinna við Blóðbergsgarðinn en einnig við listamenn og hönnuði t.d Gler í Bergvík og Leir 7 á Stykkishólmi.

Fundur haldin hjá Velferðarráðuneytinu Hafnarhúsinu 30.nóvember 2012

Pétur B. Matthíasson frá Fjármála- og efnahagsráðuneytinu fjallaði um CAF sjálfsmatslíkan fyrir stofnanir og sveitarfélög, en ráðuneytið hefur nýlega opnað upplýsingavef fyrir CAF, sem hann kynnti. Hallgrímur H. Gröndal fjallaði um CAF reynslu hjá Ríkiskaupum. Um 20 manns sóttu fundinn.

Hér má finna slóðina inn á CAF vef Fjármála- og efnahagsráðuneytis http://www.fjarmalaraduneyti.is/verkefni/umbaetur_i_rikisrekstri/caf_sjalfsmatslikan/

7 lyklar að árangri í ríkisrekstri - fyrri grein
Fagleg og árangursrík stjórnsýsla og opinber rekstur stuðla að samkeppnishæfara samfélagi. Skatttekjur ríkisins eiga að duga fyrir samtíma samneyslu. Opin gagnsæ samskipti við borgarana er lykilforsenda fyrir réttu vali á forgangsverkefnum - hverju á að sinna og hverju ekki. Árangur hjá ríkinu verður mestur ef gætt er að eftirfarandi 7 lyklum - þeir rétt samsettir og stöðug miðlun upplýsinga og þekkingar á milli almennings, stofnana, ráðuneyta og Alþingis.

1. Lög - Fjárlög. Almennt er gerð krafa um að lög skapi skýrar og skilvirkar leikreglur fyrir einstaklinga og atvinnulífið. Lög afmarki skýrt verkefnin sem ríkið ætlar í raun að sinna og fjárveiting í samræmi. Með því að ákveða ramma fjárlaga til 3 ára minnkar óvissa og stefnan verður markvissari.
2. Ráðuneytin. Þar er mesta krafan til hins faglega stjórnsýslustarfsmanns sem nýtur trausts ráðherra, stofnana og hagsmunaaðila. Ráðuneytin eiga að vera í skilvirkum faglegum samskiptum við stofnanir og gera samninga við þær um lykilverkefni, þjónustustig og árangur. Sérstaklega þarf að gæta að því að ráða til ráðuneyta reynslumikla og hæfa sérfræðinga og stjórnendur.
3. Forstöðumaður stofnunar er í miðri hringiðunni. Hann nýtur trausts hjá ráðuneyti, starfsfólki og hagsmunaaðilum. Hann stendur faglega að ráðningum og símenntun. Hann skapar menningu þar sem stöðugt er reynt að finna leiðir til að leysa verkefnin á framúrskarandi hátt.
   Í síðari greininni verður fjallað um seinni 4 lyklana tengdum stefnu, auðlindum, nýsköpun og opinni stjórnsýslu. Mikilvægt er að allir 7 lyklarnir séu settir í rétt samhengi. Stöðug síendurtekin leit að betri lausnum er leiðin að auknum lífsgæðum og samkeppnishæfara Íslandi. Sjá grein á www.stjornvisi.is
   Þorvaldur Ingi Jónsson, ráðgjafi, viðskiptafræðingur, Ms í stjórnun- og stefnumótun. Stjórnarmaður í Stjórnvísi

Ágæti viðtakandi.

Ég undirritaður, Jón G. Hauksson, ritstjóri Frjálsrar verslunar, er formaður stjórnar Stjórnvísi og langar að vekja athygli á félaginu og hversu gagnlegt og hagkvæmt er fyrir fyrirtæki að vera í því.

Stjórnvísi býður upp á hátt í hundrað ókeypis viðburði um stjórnun á hverju ári, félagsmönnum að kostnaðarlausu. Fyrirtækin greiða hins vegar fast árgjald fyrir starfsmenn sína og er hægt að fullyrða að þátttaka í Stjórnvísi er ódýrasta símenntunin á Íslandi. Stjórnvísi hét á árum áður Gæðastjórnunarfélag Íslands.

 Stjórnvísi er stærsta stjórnunarfélag á Íslandi með tæplega 2.000 virka félagsmenn  
 og um 285 fyrirtæki innan sinna raða.

       Stjórnvísi er áhugamannafélag í eigu félagsmanna og starfar ekki með
       fjárhagslegan ágóða í huga.

 Stjórnvísi er opið öllum einstaklingum, fyrirtækjum og stofnunum sem hafa áhuga   
 á stjórnun; eins og stjórnendum, sérfræðingum, nemendum og öðrum 
 áhugamönnum um stjórnun.

       Stjórnvísi býður hagstæðustu símenntunina. Flest námskeiðin eru ókeypis fyrir 
       félagsmenn.

       Stjórnvísi er með kjarnastarf sitt í kraftmiklum faghópum félagsmanna en 
       jafnframt stendur félagið fyrir almennum ráðstefnum, viðburðum og verðlaunum 
       um stjórnun.

Nýlega hélt Stjórnvísi haustráðstefnu sína í Hörpunni sem vakti verðskuldaða athygli. Ráðstefnan bar yfirskriftina AÐ SKAPA FRAMTÍÐINA. Fyrirlesarar voru þeir Jón von Tetzchner, frumkvöðull og stofnandi Operu Software í Noregi, Vilborg Einarsdóttir, framkvæmdastjóri Mentors og David Martin, sérfræðingur í öryggismálum ríkja og stórfyrirtækja.

Með kveðju,
Jón G. Hauksson, formaður stjórnar Stjórnvísi.

Ég tel að þrátt fyrir að við séum meðvituð um hluta af okkar samskiptamynstri sé stór hluti sem við erum okkur ekki meðvituð um.
Ef þú vilt breyta eða bæta samskipti þín er góð leið að byrja á því að skoða hvernig þau birtast þér í dag. Það getur hjálpað að skrifa það niður eða að ræða við aðila sem þú treystir. Síðan getur þú bætt við hvers vegna þú vilt breyta eða bæta samskipti þín. Ef þú sérð engin mynstur í þínum samskiptum sem þú vilt breyta eða bæta er gott að skrifa niður eða ræða um hvað einkennir góð samskipti og hvers vegna þessi atriði skipta máli.
Þessi aðferð getur auðveldað þér að koma auga á hvar þú getur bætt þig hvað samskipti varðar. Þegar þú veist hverju þú vilt breyta eða bæta í þínum samskiptum er gagnlegt að skrifa niður eða ræða um hvernig þú sérð samskipti þín fyrir þér eftir þessar breytingar.
Hvað einkennir vinnudaginn, heimilislífið og aðrar aðstæður eftir þessar breytingar?
Hverju breytir það þegar þú hefur bætt eða breytt þínum samskiptum við sjálfan þig og aðra?
Er hugsanlegt að þú getir stuðlað að því að aðrir bæti sig í samskiptum?
Þegar þú hefur farið yfir þau samskipti sem vilt sjá hjá sjálfri/um þér getur þú ákveðið hvernig þú ætlar að bæta samskipti þín við sjálfa/n þig og aðra. Flest getum við verið sammála um að það sé mikilvægt að eiga góð samskipti við okkur sjálf og þá sem eru í kringum okkur.

Annetta Ragnarsdóttir ACC markþjálfi Eigandi og framkvæmdarstjóri Anra